الأحد، 27 يناير 2008

هيج

هج
باللى الباقى جوة دماغك
شوف كام برج
لسه سلام
كل ما تتفرج بتضج
راح تتسوى مع الايام
كل ما تسكت يغلى الدم
ينفر عرقك
يتكلكع جواه الهم
كل ما تبلع تبلع غم
اللى حييجى ,
راح يقصفلك عمرك قصف
واللى حيرجع
مش هايغر حظك حرف!
نفسك تلقى لهمك وصف؟
..بس حروفك قدمت منك
وموديلات اليوم مش شبهك
ومابتعرفشى تقول إشمعنى
وبتسمعهاف يومك نغمة
يمكن ف موبايلك حتى
كل العالم بيقولها
طب انتا؟
إشمعنى إنت؟
ماتعرفش
إشمعنى إنتا ماتقدرش؟
تسرق لقمة ف إيد الغير
تقتل حلم
وتدبح طير
تتفنن ف عذاب الكل
إشمعنى إنتابتتكتف بمبادئ صممها ضمير؟
إشمعنىإنتا وإشمعنى؟!!
ومدام موش ناوى تتغير
حتفضل تحفة ف برواز
ومغطى وشك بإزاز‘
يبقى وجودك موش بيسر.
لو تقدر تخرج من جوه
الحق
قبل الفرصة ماتسوى
نادى حلم على الله يرد
و إن ما قدرتش
يبقى ضرورى بسرعة تهج
بللى باقيللك جوه دماغك
ولا تستسلم ‘
أحسن همك هيجيب داغك
إهرب باللى باقيلك وإرحل
من بروازك
لو باقى على عشرة فنجانك
رافض يتبدل بالمج
خدها نصيحة:
..يابنى بسرعة
هج .

ليست هناك تعليقات: