حرب النكران

ابن الناس مهما الدنيا جت عليه

مسيره يركب , ويدلدل رجليه...

كلمة سمعتها قريب وماصدقتهاش

عارف ليه؟

لان ابن الناس دايما عايس فى ابتلاء ومظلوم

ماينفعش غير انه يقول الحمد لله...

الايام دى اقعدت افكر فى حياتى خصوصا والحياة كمعنى ومضمون واسلوب عموما,

ولما لقيت الدنيا واخده موقف منى

وموش عايزة تيجى فى صفى,

حسيت انى عايش فى نكسة داخلية وشخصية لاتقل عن نكسة 67 اللى البلد عاشتها

بس اللى يفرق انى انا لوحدى .

والفترة اللى تلت النكسة حروب الاستنزاف ,

واللكلمة معناها صحيح لحد كبير ,

فانا عايش حرب استنزاف مع الدنيا,

بس انا موش زى بورسعيد مثلا وعندى افكار فدائية واعرف ادى الضربة والاقى واصد...

لسبب واحد :

الدنيا ما بتخدش ضربات,

الدنيا...بتضرب بس.

حرب استنزاف شغالة والدنيا موش عاتقانى ,

شوية نزيف تفكير

او جروح فى الضمير

او.. او ...او

انتا عارف الدنيا وضربها ....

من وقت قريب جدا ,ولانى كنت مقاوم ولازلت مقاوم...

فالدنيا غيرت التكتيك الهجومى ولقيتنى فى حرب من نوع جديدة....

حاجة اسمها حرب النكران

واحد عبيط يقول يعنى ايه؟

هقوله : الهدف منها هو تجاهلك ونكرانك

ووجود حلمك و

و....

وجودك كللك

فتلاقى نفسك محتار تعمل ايه؟

تتنازل عن شوية احلام اكتر مانتا متنازل؟

تقبل وتعيش زى كتييير

اكل وشرب ونوم والدماغ يفكر فى قرش او الغدا ايه

وبس كده؟

اسلوب اتبعته الدنيا كتيير مع مختلف الانواع البشرية

لحد الوقتى انا بقاوم

موش عايز اكون نموذج جديد ناجح للخراف الادمية

بحاول اكتب

بحاول اقول انى موجود

بحاول اقول:للدنيا طظظظ

رغم انى عارف انى بضحك على نفسى

لكن طظ

الدنيا قايمة على المسكنات

موش كده....

اصعب شيئ لما تكون من جواك كويس

وتتطضر تتعامل مع زبالة...

****كان فى واحد اسمه عبد الرحمن الكواكبى قال مرة

ان فى الازمنة العصيبة الفاسدة الحال , الناس الصالحون لا يالفون فسادها

فيقبلون الظلم وتالف عيونهم المنكر, فيتحولو من مصلحين الى صالحين

صالحين فقط.

والزبالة بقت كتير اوى وريحتها بتفوح من نفوس ميتة

وقلوب عطبانة

وضماير اقرب انها تكون ضماير انسان الى.

الراعى بيتعامل مع الديب؟

الفلاح بيتعامل مع الطور؟

ايوه بيتعامل , بس بيلجمه

طيب ده لما يكون حيوان يبقى سهل السيطرة عليه

لكن لو بنى ادم

موش سهل ابدا السيطرة عليه الا بالقوة او بالنفوذ

والقوة فى ايد ولى الامر والنفوذ =فلوس ومنصب وجاه

ولحين لما ييجى النفوذ دا ان جه..

هفضل مضطر انى انزل كل يوم الشارع وانا ونصيبى

تخبطنى بهيمة

يعضنى كلب

يدوس على رجلى طور

او يتعب عقلبى مع خنزير مالوش غير فى الاكل

وهافتكر اسد الغابة:

كان ملك

والانسان سمّج عليه وحططه فى القفص

وكسر عينه ...

وخلى العيال الصغيرا السخفا

يتريقوا عليه

ويرموله لب وقشر فول سودانى

وقول معلش :

ليس...هذا...زمن.....الفرسان

هذا...زمن.............

الكلاب

ده لو فراخ...صوتها هيتسمع

يعنى انا نفسى افهم ليه الدانمارك بالذات اختارت انها تكون فى مواجهة مع العالم الاسلامى؟
بلد البقر والجبن بتتحدى المسلمين كلهم...فى ايه؟
فى حديث حاضرنى الوقتى للنبى الكريم صلى الله عليه وسلم قال فيه:واللذى نفسى بيده ليعودن الدين غربا كما بدا غريبا....
انتا موش شايف ان ايام ظهور الاسلام الاولى تشبه الى حد كبير الايام الى بيعيشها المسلمين الوقتى؟
ايه الفرق؟
كلام بايخ بيتقال ؟ موجود
افعال سفيهة وغير مسؤولة؟ موجود برضه
تحديات وقحة؟ اه برضه
بس الفرق بين زمان والنهاردة ,ان قريش بتوع زمان مكانوش زى الوقتى ,
يعنى والله يمكن كانو محترمين ...عارف ليه؟
الكفار زمان كانو عارفين النبى ص كويس وبالذات انه صادق وامين واخلاقه عالية جدا
والمشكلة كانت انهم موش مصدقين الدعوة اللى بيدعوا ليها
فقالوا عليه مجنون.
محدش رسمله رسم او اتطاول عليه التطاول اللى موجود الوقتى
وبعدين المسلمين على الرغم من انهم كانو ضعفا ايامها جدا لكن عرفوا يديروا الازمة صح مع عدم نسيان انهم عدد قليل فبعد فترة صغيرة كانت غزوة بدر ونجاحها فى دعم الاسلام بقوة
طيب احنا بقى؟
صحيح الزمن اتغير وزمن الغزوات اختفى بالنسبة لينا, لكن الحرب موش سلاح وبس
فى حرب عقول وادمغة...حرب ثقافية ....وغيره
احنا بقى معندناش اى فكرة نقدر نعمل ايه مع الدانمارك
وبعدين الدانمارك؟
الدانمارك؟؟؟؟
دى بلد عبيطة جيشها اد ايه ؟ وسكانها اد ايه ؟ واقتصادها ايه اخباره؟
خش على globalsecurity هتعرف انها عبيطة
لكن العبيط عمل بالو وموش هامه حاجة...
وعلى فكرة القصة موش قصة الدانمارك وبس لاااااء
انتا لو فاكر كده تبقى لا نايم ومش عارف حاجة
اخر حاجة ممكن اقولها كلمات بفتكرها جامد اوى الوقتى:
الاغنية بتاعة المجموعة :والكوبليه بتاع :
مليار ونص من البشر مكسوفين منك اوى والله يا رسول الله
ده لو فراخ ...صوتها هيتسمع...
اى فرخة سليمة او عيانة لما بتندبح بتملى الدنيا صويت
المطلوب انك تموت او تنهان وماتفتحش بقك بحرف كده
فى الاخر برضه افتكر كلمه احسن الناس محمد صلى الله عليه وسلم:
صبرا آل ياسر فان موعدكم الجنة...
وافكر نفسى وافكركو بيها الصبر
الصبر
الصبر
ويا ريت اخر الصبر يكون طريق للجنة

هيج

هج
باللى الباقى جوة دماغك
شوف كام برج
لسه سلام
كل ما تتفرج بتضج
راح تتسوى مع الايام
كل ما تسكت يغلى الدم
ينفر عرقك
يتكلكع جواه الهم
كل ما تبلع تبلع غم
اللى حييجى ,
راح يقصفلك عمرك قصف
واللى حيرجع
مش هايغر حظك حرف!
نفسك تلقى لهمك وصف؟
..بس حروفك قدمت منك
وموديلات اليوم مش شبهك
ومابتعرفشى تقول إشمعنى
وبتسمعهاف يومك نغمة
يمكن ف موبايلك حتى
كل العالم بيقولها
طب انتا؟
إشمعنى إنت؟
ماتعرفش
إشمعنى إنتا ماتقدرش؟
تسرق لقمة ف إيد الغير
تقتل حلم
وتدبح طير
تتفنن ف عذاب الكل
إشمعنى إنتابتتكتف بمبادئ صممها ضمير؟
إشمعنىإنتا وإشمعنى؟!!
ومدام موش ناوى تتغير
حتفضل تحفة ف برواز
ومغطى وشك بإزاز‘
يبقى وجودك موش بيسر.
لو تقدر تخرج من جوه
الحق
قبل الفرصة ماتسوى
نادى حلم على الله يرد
و إن ما قدرتش
يبقى ضرورى بسرعة تهج
بللى باقيللك جوه دماغك
ولا تستسلم ‘
أحسن همك هيجيب داغك
إهرب باللى باقيلك وإرحل
من بروازك
لو باقى على عشرة فنجانك
رافض يتبدل بالمج
خدها نصيحة:
..يابنى بسرعة
هج .

بكرة احلى

دايما تسمع الناس تقولك بكرة احلى
ومعلهش ميسرها تروق وتحلى
وسيبها على الله
ووالنبى تصلى على النبى هتفك ونديها على قفاها
تقولهم ازاى ؟ يقولوللك ايه ياعم فى ايه؟ بنقولك هتروق وتحلو
احنا بنقرا فى سورة عبس؟
طيب هى هتروق وتحلو بامارة ايه؟
الدنيا الامورة اللذيذة اللى عايشنها؟
ولا الفلوس الكتير اللى لقيناها اول ما جينا الدنيا؟
ولا الغلا والزحمة والقرف والدوشة اللى مبقاش ينفع يتظيط عليها لانها بقت تمام كده وبقت حلوة اوى وتمام التمام وبتظيط على اى ظيطة جنبها؟
ولا حتروق وتحلى وتجيب امل وبكرة ورور مع الحروب اللى الية الدنيا حوالينا والخناقات الدولية على كام برميل بترول؟
وبعدين بامارة ايه الحلاوة اللى مستنيينها؟
المولد خلص ...
انا كل ما مشى فى الشارع وابص للناس استغرب اوى
انا موش هلنجر واحكى حاجات كل واحد قاهرى او اقليمى او حتى اى انسان عايش فى بلد نامى عارفاها
اصل ده اسمة ديرتى غسيل وميصحش برضه ..انتا فاهمنى؟
انا باسال نفسى هى البلد ما شية كده بالصلاة على النبى لحد فين؟
جهل وبيرجع تانى
شوف العيال الى فى المدارس تفكيرها بقى ازاى ...يا صحبى بقى كله فى الكلتش

مرض وبيزيد كل يوم
اقعد على قهوة ولابلاش قهوة كافيه حتى او روح مطعم كبير وهات سندوتشات عشان تاكل شوف العامل اللى بيديلك الاكل او الطلب عاملين ازاى
طب بلاش
قريت الخبر اللى بيقول ان المية المعدنية اللى عندنا فى مصر غير صالحة للاسهتلاك الادمى؟
لو متعرفش اهو انتا عرفت
دى باختصار ازمة ضمير
الاميه : والله العظيم الجاهل الجهلول ارحم من متعلم ما يعرفش يعنى ايه الف بيه طهارة او ميعرفش فين اليابان من الصين وهو الفرق بينهم ايه.
طب والله العظيم فى مسلسل عربى واحد من الابطال عامل دور باشا فى فترة الملك فاروق رحمه الله , الممثل كان بيتناقش مع ممثلين تانيين عن الحرب العالمية والحلفاء , وراح مديها كلام سياسة وف وسط الكلام قال :
منقدرش نتوقع اليابام هتعمل ايه
تخيل؟ اليابام؟

الفقر: كائن ازلى ومتلازمة بديهية من بديهيات الكون زيه زى الشيطان كل الناس والاديان واختافاتها تعترف بالشيطان وبرضه تعترف بالفقر
يبقى ناقص ايه عشان نقول ان احنا بنتقدم وبكرة احلى؟
فعلا بكرة احلى بكتير
موش عايز اشوف بكرة ده

هنزل ويندوز لروحى

كتير اوى بحس انى محتاج لتغيير رغم ان حياتى موش ماشية على ريتم واحد
لكن ده نداء قوى ومقدرش انى اتاجهله
ممكن اغير اى حاجة فى حياتى
مثلا المكان اللى بتواجد فيه

الناس اللى بتعامل معاهم رغم ان ده صعب جدا
التغيير مهم جدا زى تغيير الدم بالظبط

وانا الايام دى اتعرضت لحادثة قوية فى وجدانى ونفسيتى

ضاعت احلامى هناك وهنا كمان

واللى اقدر اعمله موش انى ادور عليها...لاء دا تفكير قديم

الحلم لو راح فى غيره كتير

اللى هعمله الوقتى اخد فترة نقاهة لعلاج

الكسور النفسية اللى حصلت

هاراجع حاجات كتير وابص ليها بجد

هدلت حاجات واسيف حاجات

باختصار محتاج اعمل اب دات....

اب دات لدنيتى

اب دات ليا انا

انا

كلمة غالية على كل واحد لكن ازاى يعبر كل واحد عن حبه للانا الخاصة بيه

هو ده السؤال اللى هدور على اجابته ويمكن لو جاوبته الاقى كام حلم ضاع .

موش معنى انى حانزل ويندوز جديدة لروحى انى هكون اوف لاين او مهنج او موش فى الدنيا يعنى

لاء ابدا

انا كده كده موجود لان فى وقت لازم اخلصه هنا فى الدنيا دى

ممكن تشوفنى جنبك....او حتى فىكلام او فعل حد جنبك فى الشارع او اى مكان

عااااااادى يعنى